2017/07/03 13:32
  • عدد القراءات 729
  • القسم : بريد المسلة

عن الامتحانات والكتب "اللزك"

ابو جهاد الناصري

-الو السلام عليكم

-منو وياي

-مساء الخير دكتور

-اهلا

-دكتور شلونك شاخبارك

-منو وياي

-دكتور انا فراس عبد الرضا طالب صف سادس علمي من الناصرية

-منو ..انته وين حصلت رقمي

-دكتور مو مشكلة وين حصلت رقمك بس المشكلة!

-لاتكول مشكلة

مشكلة شنو

-دكتور العفو بس خلي اكملك

- لاتكمل روح اقرا دروسك عندك امتحانات يله

-لحظه دكتور انته تدري بعدني ما مستلم كتاب اسلاميه لهسة!

-اي ليش ما اشتريت مو شغلتي هاي انا وزير لو اوفرلك كتب

-دكتور مو انا ماعندي ابوي شهيد

-شهيد وين؟ شهيد شنو !

-دكتور شهيد بمعركة تحرير تكريت

-منين حررها ابوك؟

-من داعش جا منين.. دكتور هسه ماعلينه بس ما صايره حديث تنزله بموقعك وتجيبه بالامتحان وبعدين تلغونه صدك جذب

-اشو لسانك طويل انته طالب لو محقق

-دكتور مو انا اريد انجح والقاعات مالاتك بالامتحانات لزك بلزك

-لزك شنو راح اثبت اسمك يمي وانا اعلمك باجر

-دكتور انا اتشاقه وياك انا (ابو قتيبة)الي ماخذ عقود تجهيز الوزارة بالكتب المدرسية

-صدگ ههههههه والله عبالي هذا الطالب ما اعرف شيريد انا شنو علاقتي بالكتب والاسئلة والقاعات

-صح دكتور انته مالك علاقة بالكتب والقاعات والاسئلة.. المهم دكتور راح نجهز الجغرافية مال السادس ابتدائي مالت ٢٠١٥ بداية موسم ٢٠١٨!

-ممتاز كلش زين هالمره مستعجلين

-اي دكتور خطيه ابنائنا

-عفية عليك اهم شي ابنائنا الطلبة!

المصدر: بريد المسلة


شارك الخبر

  • 0  
  • 0  

اضف تعليقك

لن ينشر أي تعليق يتضمن اسماء اية شخصية او يتناول اثارة للنعرات الطائفية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار المسلة علما ان التعليقات تعبر عن راي اصحابها فقط.

  •  
       
  •