2021/03/18 10:15
  • عدد القراءات 4165
  • القسم : المواطن الصحفي

مواطن يكشف لـ المسلة عن موظفين بمصرف الرافدين يبتزون الزبائن و يساومونهم

تابع المسلة عبر قناتها في تطبيق التلغرام

https://t.me/almasalah

-----------------------------------

بغداد/المسلة: كتب صوفي آل دليم باللهجة الدارجة الى المواطن الصحفي في المسلة..

خل اسولفلكم تجربتي اليوم بمصرف الرافدين الفرع الرئيسي.

رحت وية ولد اثنين اصدقائي اخذو كتاب استمرارية من الويتهم بالاتحادية ورحنة للمصرف حسب توجيهات الاخ الميرزا وصار الاتي.

طبينة للقاعة لكينة امم محد ... ولا احد ... ناس صارلهة شهر وناس صارلهة عشرين يوم ومكملين كلشي ومستلمين القصاصة ... شوية ركزولي عالقصاصة ... ومحد يسلمهم فلوس وام الجاري ماكو وجان نسأل الاخ الي بالاستعلامات كلنالة عمي هذولة الولد عدهم كتاب استمرارية ويريدون يستلمون ... السلفة الفورية ... ضحك ضحكة كبيييييرة وكال اي وهسة شتريدون .

ضلينة صافنين واحد عالثاني هذا شبي ميفتهم .

عدنة نفس الحجي عليه.

كال عمي انتظرو ((سيد صفاء)) وهوة يجاوبكم.

انتضرنا السيد وجان يجي ولد اكرع طويل لابس قاط نيلي والناس تركض وراه .

كالو هذا سيد صفاء .

كلنالة سيد هيج وضعيتنا وهاي الكتب مثل ما نشرتوا وكلتو ... كال ما استلم اي طلب علية لووووود .

توسلنا ما فاد.

اجانا ولد اخذنة على صفحة وكال عمي تنطون خمسمية.

اي.

500.000 دينار.

كلنالة وبعدين.

كال اجيبلكم قصاصة زركة وشوفنة وحدة بيده .

سالته كلتلة وبعدين .

كال تنتظرون شوية ويصيحوكم بالارقام الي عدكم .

بس انتو تمشون.

ضحكنا بعقلة واستكثرنا المبلغ .

اشو الناس اغلبهة راحت عالولد الي راح انشر صورتة.

واخذوا منه قصاصات زرك.

كلنة خل ننتظر ونشوف .

وراهة اجتي ام الصندوق ... وجان تمشي بس القصاصات الزرك .

لا يا ... كلهة متفقة عالبوكة .

واحنة نتعجب من نشوف موظف راتبه 600 وصاعد سيارة ب 3 شدات.

اثاري كلهم حرامية وسراق ..

السيد مدير عام مصرف الرافدين الله شاهد ورقيب على كل كلمة كتبتهة بالمنشور .

رجعو التقديم الالكتروني وخلصو الناس من  المساومات والسرقات .

بريد المسلة 

المسلة غير مسؤولة عن المحتوى (نصا ومعنى) والذي يتضمن اسم الكاتب والمصدر


شارك الخبر

  • 14  
  • 0  

اضف تعليقك

لن ينشر أي تعليق يتضمن اسماء اية شخصية او يتناول اثارة للنعرات الطائفية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار المسلة علما ان التعليقات تعبر عن راي اصحابها فقط.

  •  
       
  •